Portugaliya terma jamoasi bosh murabbiyi Roberto Martines 41 yoshli Krishtianu Ronaldu nima uchun milliy jamoa uchun hanuz eng muhim futbolchilardan biri bo‘lib qolayotganini tushuntirdi.

Murabbiyning so‘zlariga ko‘ra, afsonaviy hujumchining ta’sirini faqat statistika orqali baholab bo‘lmaydi.

«Biz gapirayotgan futbolchi — o‘yinni o‘zgartirgan betakror futbolchi. Uning futbolga sadoqati yoshlar uchun namuna bo‘lib xizmat qiladi. Terma jamoada 21 yil, 227 ta o‘yin — hech kim bunday natijaga erishmagan. Bu raqamlarning barchasi Krishtianu Ronalduni haqiqiy afsonaga aylantiradi.

Uning markaziy hujumchi sifatidagi ta’siri juda katta. Uning harakatlanishi, pozisiya tanlashi, hujumlarni yakunlashi va sheriklari uchun bo‘sh hududlarni ochish qobiliyati jamoa o‘yiniga katta ta’sir ko‘rsatadi», — dedi Martines The Athletic nashriga bergan intervyusida.

Murabbiy shuningdek, Ronaldu faoliyati yakunlanganidan keyin uni to‘liq o‘rnini to‘ldirish mumkin emasligini ta’kidladi.

«Krishtianuni birga-bir almashtirib bo‘lmaydi. Bu imkonsiz. Uning samaradorligini bir futbolchi bilan qoplab bo‘lmaydi. Bizga boshqa yechimlar topish va hujum uslubini o‘zgartirishga to‘g‘ri keladi», — dedi u.

Bundan tashqari, Martines fojiali tarzda hayotdan ko‘z yumgan Diogu Jotani ham yodga oldi va uni «Portugaliya terma jamoasining nuri» deb atadi.

«Diogu — bizning nurimiz. U Portugaliya bilan jahon chempionligini orzu qilardi. Endi bu biz uchun qo‘shimcha motivasiya. Uning ruhi jamoamizning bir qismi bo‘lib qoladi», — dedi murabbiy.

JCH–2026da Portugaliya terma jamoasi "K" guruhida Kolumbiya, O‘zbekiston va Kongo DR terma jamoalari bilan birga ishtirok etadi. Dastlabki uchrashuv 17 iyun kuni Kongo DRga qarshi o‘tkaziladi.