Meksika o‘qituvchilar kasaba uyushmasi a’zolari Meksikada bo‘lib o‘tadigan jahon chempionati fan-zonasining ochilishini barbod qilish bilan tahdid qilmoqda. Bu haqda ESPN nashri xabar bermoqda.

Ma’lumotlarga ko‘ra, olti mingga yaqin namoyishchi fan-zona tashkil etilishi rejalashtirilgan maydonga (Mexiko markazidagi Sokalo maydoniga) yig‘ilgan va talablari bajarilmaguncha o‘sha yerda palatali lager qurishni rejalashtirmoqda. O‘qituvchilar mehnatga haq to‘lash tizimini qayta ko‘rib chiqishni va pensiya ta’minotini 2007 yilgi tizimga qaytarishni talab qilishmoqda.

Mavjud vaziyat tufayli rasmiylar fan-zonani boshqa joyga ko‘chirish variantini ko‘rib chiqmoqda. Meksika prezidenti Klaudiya Sheynbaum ushbu namoyishlarni «provokasiya» deb atadi.

«Ular go‘yo Meksikada ommaviy ijtimoiy inqiroz hukm surayotgandek taassurot uyg‘otmoqchi, ammo bu haqiqatga to‘g‘ri kelmaydi», — dedi mamlakat rahbari. Shuningdek, u hukumat voqealar rivojini doimiy nazorat qilib borayotganini va ochilish o‘yini muvaffaqiyatli o‘tishi «kafolatlanganini» qo‘shimcha qildi.

Eslatib o‘tamiz, Jahon chempionatining ochilish uchrashuvida mezbon Meksika terma jamoasi JARga qarshi maydonga tushadi. O‘yin Toshkent vaqti bilan 12 iyunga o‘tar kechasi soat 00:00 da Mexikodagi markaziy stadionda boshlanishi belgilangan.