Мексика ўқитувчилар касаба уюшмаси аъзолари Мексикада бўлиб ўтадиган жаҳон чемпионати фан-зонасининг очилишини барбод қилиш билан таҳдид қилмоқда. Бу ҳақда ESPN нашри хабар бермоқда.
Маълумотларга кўра, олти мингга яқин намойишчи фан-зона ташкил этилиши режалаштирилган майдонга (Мехико марказидаги Сокало майдонига) йиғилган ва талаблари бажарилмагунча ўша ерда палатали лагерь қуришни режалаштирмоқда. Ўқитувчилар меҳнатга ҳақ тўлаш тизимини қайта кўриб чиқишни ва пенсия таъминотини 2007 йилги тизимга қайтаришни талаб қилишмоқда.
Мавжуд вазият туфайли расмийлар фан-зонани бошқа жойга кўчириш вариантини кўриб чиқмоқда. Мексика президенти Клаудия Шейнбаум ушбу намойишларни «провокация» деб атади.
«Улар гўё Мексикада оммавий ижтимоий инқироз ҳукм сураётгандек таассурот уйғотмоқчи, аммо бу ҳақиқатга тўғри келмайди», — деди мамлакат раҳбари. Шунингдек, у ҳукумат воқеалар ривожини доимий назорат қилиб бораётганини ва очилиш ўйини муваффақиятли ўтиши «кафолатланганини» қўшимча қилди.
Эслатиб ўтамиз, Жаҳон чемпионатининг очилиш учрашувида мезбон Мексика терма жамоаси ЖАРга қарши майдонга тушади. Ўйин Тошкент вақти билан 12 июнга ўтар кечаси соат 00:00 да Мехикодаги марказий стадионда бошланиши белгиланган.
