“Manchester Siti” yarim himoyachisi Rodri ko‘plab mish-mishlarga qaramay, Madridning “Real” klubiga o‘tmasa kerak. “Shaharliklar” yulduzining nomi anchadan beri “qirollik klubi” bilan bog‘lab kelinardi va xavbekning o‘zi ham kelajakda bunday ssenariy bo‘lishini inkor etmasligini tan olgan edi.
Cadena SER nashrining xabar berishicha, “Real”ning ba’zi rasmiy shaxslari Rodrini jamoada ko‘rishni xohlashgan, biroq Florentino Peres 29 yoshli ispaniyalik futbolchining nomzodiga qarshi chiqqani sababli ushbu transfer amalga oshmaydigan bo‘ldi.
Yaqinda Peres Madrid grandi prezidentligiga qayta saylandi. Saylovda Peresning yagona raqibi bo‘lgan Enrike Rikelme Rodri bilan kelishuvga erishganini da’vo qilgandi, ammo futbolchining o‘zi bu ma’lumotni rad etdi.
