Fransiya terma jamoasi chap qanot himoyachisi Lyuka Ernandes Kilian Mbappe va Usman Dembele o‘rtasidagi munosabatlar tarang ekanligi haqidagi ma’lumotlarni rad etdi. “PSJ” futbolchisining so‘zlariga ko‘ra, hujumchilar o‘rtasida hech qanday kelishmovchilik yo‘q — ular do‘st bo‘lib qolmoqda.
“Kilian va Usman maydonda ham, undan tashqarida ham doim birga. Ular juda ko‘p hazil qilishadi. Men va Dembele “PSJ”ga kelganimizda, Mbappe bilan munosabatlarimiz yanada yaqinlashdi. Keyinchalik, Kilian Madridga ketganidan so‘ng ham biz deyarli har hafta telefon orqali gaplashib turdik”, — deya Ernandesning so‘zlarini Actu Foot nashri keltiradi.
Fransiya terma jamoasi JCH-2026 guruh bosqichining 1-turi doirasida Senegalga qarshi bahs olib boradi.













