«Atalanta» klubi qanot himoyachisi Marko Palestra «Manchester Siti»ga o‘tishga yaqin turibdi. Bu haqda City Xtra nashri xabar bermoqda.
Manbaning ma’lum qilishicha, Angliya grandi 21 yoshli italiyalik futbolchi bilan shaxsiy shartnomaning barcha shartlarini kelishib olgan. Shu bilan birga, «Inter» ham poygada qatnashishda davom etmoqda, biroq «Atalanta» hozircha ushbu klublarning hech biri bilan kelishuv summasi borasida bir qarorga kelgani yo‘q.
Italiya chempionatining yakunlangan mavsumida Palestra ijara huquqi asosida «Kalyari» safida to‘p surdi. Himoyachi 37 ta uchrashuvda maydonga tushib, bitta gol urdi va to‘rtta golli uzatma muallifiga aylandi. Mavsum yakunlariga ko‘ra, Palestra Italiya A Seriyasining eng yaxshi himoyachisi deb topildi.
