«Аталанта» клуби қанот ҳимоячиси Марко Палестра «Манчестер Сити»га ўтишга яқин турибди. Бу ҳақда City Xtra нашри хабар бермоқда.
Манбанинг маълум қилишича, Англия гранди 21 ёшли италиялик футболчи билан шахсий шартноманинг барча шартларини келишиб олган. Шу билан бирга, «Интер» ҳам пойгада қатнашишда давом этмоқда, бироқ «Аталанта» ҳозирча ушбу клубларнинг ҳеч бири билан келишув суммаси борасида бир қарорга келгани йўқ.
Италия чемпионатининг якунланган мавсумида Палестра ижара ҳуқуқи асосида «Кальяри» сафида тўп сурди. Ҳимоячи 37 та учрашувда майдонга тушиб, битта гол урди ва тўртта голли узатма муаллифига айланди. Мавсум якунларига кўра, Палестра Италия А Сериясининг энг яхши ҳимоячиси деб топилди.
