Belgiya terma jamoasi yarim himoyachisi Kevin de Bryoyne jamoadoshi Jeremi Doku haqida fikr bildirdi. «Napoli» xavbekining so‘zlariga ko‘ra, «Manchester Siti» vingeri so‘nggi vaqtlarda jiddiy o‘sishga erishgan.

«Doku ancha samaraliroq o‘ynaydigan bo‘ldi. Unga qarshi 90 daqiqa davomida himoyalanishning deyarli iloji yo‘q – u bir o‘yinda albatta 10-15 marta raqiblarini aldab o‘tadi. Jeremi bir vaqtning o‘zida bir nechta raqibni o‘ziga tortadi, buning evaziga bizda ko‘proq bo‘sh hududlar paydo bo‘ladi.

Endi u qachon aldamchi harakatlar qilish kerakligini, qachon esa pas bergan ma’qulroqligini yaxshiroq tushunyapti. Biz juda yaxshi chiqishamiz va u imkoniyat tug‘ilishi bilan doim unga pas berishga harakat qilishimni biladi. Uning Jahon chempionatiga eng yaxshi sport formasida kelgani juda muhim – uning mahorati bizga juda asqotadi», – deya ma’lum qildi de Bryoyne matbuot anjumanida.

15 iyun kuni belgiyaliklar JCH-2026dagi ilk o‘yinda Misrga qarshi maydonga tushishadi.