Yaponiya terma jamoasi bosh murabbiyi Xadzime Moriyasu Jahon chempionati guruh bosqichi 1-turidan o‘rin olgan Niderlandiyaga qarshi o‘yindan (2:2) keyingi matbuot anjumanida o‘z tashabbusi bilan golland jurnalistlariga yuzlanib, yapon futboli rivojiga qo‘shgan hissalari uchun minnatdorchilik bildirdi.

«Menga so‘z berishingizni so‘rayman. Bu yerda niderlandiyalik jurnalistlar juda ko‘p va men golland xalqiga o‘z minnatdorchiligimni izhor qilmoqchiman. Men Yaponiya terma jamoasi futbolchisi bo‘lgan vaqtimda yurtimizda hali professional futbol mavjud emas edi. Meni golland murabbiyi Xans Oft tarbiyalagan va nafaqat meni — yapon murabbiylari gollandlardan juda katta ta’sir olishgan, bu esa yapon futbolining hozirgi rivojlanishiga olib keldi.

Shuningdek, shaxsan menga «Sanfrechche Xirosima» va «Urava Red Daymonds» klublarida ishlagan hamda yapon futboliga ulkan hissa qo‘shgan afsonaviy golland mutaxassisi Vim Yansen ustozlik qilgan. Nafaqat ushbu ikki murabbiy, balki Gollandiyadan kelgan ko‘plab murabbiy va futbolchilar yapon futboli darajasini ko‘tarishga yordam berishgan. Buning uchun sizlarga rahmat aytmoqchiman. Tashakkur», — dedi Moriyasu. Shundan so‘ng zal uni qarsaklar bilan kuzatib qo‘ydi.

Yaponiya terma jamoasi «F» guruhida ishtirok etmoqda, bu yerda ularga Shvesiya va Tunis terma jamoalari ham raqiblik qiladi.