Norvegiya terma jamoasi hujumchisi Erling Xoland JCH-2026 dagi raqiblar haqidagi fikrlarini bildirdi.
Norvegiya jamoasi Iroq, Fransiya va Senegal terma jamoalari bilan bir guruhdan joy olgan.
«Bizning guruhimiz qiyin. Menimcha, ushbu jahon chempionatidagi har bir jamoaning o‘ziga yarasha o‘ziga xosligi bor va guruhdan chiqish uchun juda yaxshi o‘yin ko‘rsatish kerak. Bu oson bo‘lmaydi.
Turnirdagi har bir uchrashuv murakkab kechadi.
Qolaversa, har bir jahon chempionatida shunday jamoalar bo‘ladiki, ulardan u yoki bu narsani kutmaysiz, keyin esa to‘satdan ular aql bovar qilmaydigan ishlarni amalga oshirishadi. Xuddi 2022 yilda Saudiya Arabistonining Argentinaga qarshi o‘yinida (2:1) bo‘lgani kabi.
Ular Argentinani mag‘lub etishgandi, ammo keyinchalik Argentina jahon chempionatida g‘olib chiqdi. Jahon chempionati aynan mana shu jihati bilan ham o‘ziga xosdir», – dedi Xoland.
