Marokashlik yarim himoyachi Ismael Saybari Myunxenning «Bavariya» klubiga o‘tish arafasida turibdi. Bir qator insayderlarning xabarlariga ko‘ra, ushbu kelishuv 55 million yevroga tushadi va bu transfer liga tarixidagi eng qimmat beshta sotuvdan biriga aylanadi.

Rekord braziliyalik vinger Antoniga tegishli bo‘lib, u 2022 yilda «Ayaks»dan «Manchester Yunayted»ga 100 million yevro evaziga o‘tgan edi. Ikkinchi o‘rinda Frenki de Yongning 2019 yilda «Barselona»ga 86 million yevroga sotilishi qayd etilgan bo‘lsa, kuchli uchlikni o‘sha yili «Yuventus»ga 85 million yevro evaziga ko‘chib o‘tgan Amsterdam klubining yana bir vakili Matteys de Ligt yakunlab beradi. To‘rtinchi pog‘onani Lisandro Martines (2022 yilda «Ayaks»dan «Manchester Yunayted»ga 57 million yevro) egallab turibdi, beshinchi o‘rin esa, yuqorida ta’kidlanganidek, Ismael Saybariga nasib etadi.

Shuningdek, top-10 talikdan Kodi Gakpo (2023 yilda PSVdan «Liverpul»ga 49 million), Yorrel Xato (2025 yilda «Ayaks»dan «Chelsi»ga 44 million), Muhammad Kudus (2023 yilda «Ayaks»dan «Vest Xem»ga 43 million), Davinson Sanches (2017 yilda «Ayaks»dan «Tottenxem»ga 42 million) va Irving Losano (2019 yilda PSVdan «Napoli»ga 40 million) kabi futbolchilarning transferlari joy olgan.