«Vest Xem»ning markaziy yarim himoyachisi Mateush Fernandesh «Manchester Yunayted» bilan muzokaralarni davom ettirmoqda. Bu haqda insayder Fabrisio Romano ma’lum qildi.

Manbaning bergan ma’lumotlariga ko‘ra, «Manchester Yunayted» va Fernandesh o‘rtasidagi muzokaralar yaxshi sur’atda rivojlanmoqda, chunki 21 yoshli portugaliyalik futbolchi «qizil iblislar» lageriga ko‘chib o‘tishni juda ham xohlamoqda.

«Vest Xem» Fernandeshni taxminan 98,6 million yevroga baholamoqda, ammo ideal variantda «bolg‘achilar» u uchun 116 million yevro olishni istashadi. Biroq «Manchester Yunayted» kamroq summaga kelishib olishga harakat qilmoqda va hech qayerga shoshilayotgani yo‘q. Grand klub o‘sib borayotgan yarim himoyachi uchun haddan tashqari ortiqcha pul to‘lab yubormaslik maqsadida muzokaralarni ehtiyotkorlik bilan olib bormoqda.

Yakunlangan mavsumda Fernandesh barcha musobaqalarda 42 ta uchrashuvda maydonga tushib, 5 ta gol urdi va 5 ta golli uzatmani rasmiylashtirdi.