«Milan» klubining yangi bosh murabbiyi Ruben Amorim 2026/27 yilgi mavsum uchun jamoani kuchaytirish borasidagi ustuvor maqsadni belgilab oldi. Bu haqda Tuttosport nashri xabar bermoqda.

Manbaning bergan ma’lumotlariga ko‘ra, «rossonerilar» rahbariyati yangi markaziy hujumchi qidirmoqda. Jamoa ustozi bilan bo‘lib o‘tgan muhokamalardan so‘ng, hujum chizig‘ini yangilash uchun asosiy nomzod sifatida «PSJ» forvardi Gonsalu Ramush tanlandi.

«PSJ» Ramushni taxminan 40 million yevroga baholamoqda, biroq «Milan» parijliklarni futbolchini 2027 yilda sotib olish majburiyati bilan ijaraga berish variantini ko‘rib chiqishga ko‘ndira olishidan umid qilmoqda.

Qayd etilishicha, klub muzokaralarda ehtimoliy kelishuvning barcha tomonlari bilan aloqaga ega bo‘lgan agent Jorje Mendesh xizmatidan foydalanishi mumkin. Yakunlangan mavsumda 24 yoshli futbolchi 45 ta o‘yinda maydonga tushib, 12 ta gol urdi va 2 ta golli uzatmani amalga oshirdi.

«Milan» muqobil variant sifatida ayni paytda «Al-Hilol» safida to‘p surayotgan Darvin Nunyes nomzodini ham ko‘rib chiqmoqda.