Turinning «Yuventus» klubi o‘z himoyachisi Andrea Kambyasoni sotib yuborishi mumkin.

La Gazzetta dello Sport nashri tarqatgan ma’lumotlarga ko‘ra, Italiya grandi Kambyasoning transferi bo‘yicha Angliya Premyer-ligasi vakili — Londonning «Chelsi» klubidan rasmiy taklif olgan. Londonliklar futbolchi uchun 27–28 million yevro atrofidagi ilk dastlabki taklifni yuborishgan. Biroq «Yuventus» rahbariyati ushbu transferdan kamida 35–40 million yevro ishlab olishni maqsad qilgan.

Ortda qolgan klub mavsumida 26 yoshli Kambyaso barcha musobaqalarni inobatga olgan holda jami 47 ta o‘yinda maydonga tushdi. Ushbu uchrashuvlarda u 3 ta gol urishga hamda 5 ta golli uzatmani amalga oshirishga muvaffaq bo‘ldi.

Qolaversa, himoyachining «Yuventus» klubi bilan amaldagi mehnat shartnomasi 2029 yilning yoziga qadar mo‘ljallangan.