Portugaliya milliy terma jamoasi bosh murabbiyi Roberto Martines guruh bosqichi 1-turida DR Kongo bilan qayd etilgan durangdan (1:1) so‘ng, jamoaning Jahon chempionatidagi istiqbollari haqidagi savolga javob berdi. Portugaliyaliklar mundialning asosiy favoritlaridan biri sifatida e’tirof etilayotgan edi, biroq dastlabki o‘yin optimizm uchun u qadar katta asos bo‘la olmadi.
«Biz Jahon chempionatida albatta g‘alaba qozonishimiz shart, degan majburiyat yo‘q. Biz yaxshi o‘yin ko‘rsatishimiz va bizdan talab qilinadigan ishni bajarishimiz kerak. Turnirda g‘olib chiqish majburiyati yukini yelkalarimizda ko‘tarib yurishni istamaymiz. Bizning birinchi maqsadimiz — guruh bosqichida imkon qadar ko‘proq ochko jamg‘arishdir», — deya Martinesning jurnalistlar bilan suhbatdagi so‘zlarini keltirmoqda matbuot xizmati.
Eslatib o‘tamiz, 2-turda Portugaliya terma jamoasi O‘zbekistonga qarshi maydonga tushadi — ushbu bahs 23 iyun kuni bo‘lib o‘tadi.
