Afsonaviy bokschi Floyd Meyvezer Las Vegasda qimmatbaho soat xarid qilishda firibgarlikka qo‘l urganlikda ayblanmoqda. Shu sababli uning ustidan jinoyat ishi qo‘zg‘atilgan. Al Jazeera nashrining xabar berishicha, 49 yoshli sobiq bokschi 2024-yilning dekabr oyida “Gold and Beyond” do‘koniga 200 ming dollarlik chek yozib bergan. Biroq uning bank hisobida bunday mablag‘ bo‘lmagan. Las Vegas prokuraturasi buni qasddan qilingan firibgarlik deb baholamoqda.

Unga ko‘ra, 15 iyun, dushanba kuni ushbu ish bo‘yicha o‘tgan dastlabki sud majlisida Meyvezerning o‘zi qatnashmagan, uning o‘rniga advokati ishtirok etgan. Bokschiga nisbatan rasman “yirik miqdordagi o‘g‘rilik” hamda “firibgarlik maqsadida soxta chek taqdim etish” ayblovlari e’lon qilingan. Navbatdagi sud tinglovlari sentyabr oyiga belgilangan.

Nevada shtati qonunlariga ko‘ra, agar Floydning aybi tasdiqlansa, firibgarlik uchun 1 yildan 4 yilgacha, yirik o‘g‘rilik uchun esa 1 yildan 20 yilgacha qamoq jazosiga hukm qilinishi mumkin. Shuningdek, u katta miqdorda jarima to‘lashi va yetkazilgan zararni qoplashi kerak bo‘ladi. Bokschining vakillari hozircha bu holat yuzasidan hech qanday izoh bermagan.

Ta’kidlash kerakki, so‘nggi paytlarda Meyvezerning bu kabi muammolari ko‘payib qolgan. Avvalroq u Nyu Yorkda ijara pulini to‘lamagani uchun sudga berilgan, shuningdek, bir necha zargarlar bilan ham moliyaviy mojarolarga o‘ralashib qolgandi. Uning o‘zi esa sobiq menejerini ko‘p yillik firibgarlikda ayblab, sudga da’vo arizasi kiritgan.

Eslatib o‘tamiz, Meyvezer professional boksda 50 ta jang o‘tkazib, ularning hech qaysida mag‘lub bo‘lmagan. Besh karra Jahon chempioni shu yozda yana ringga qaytishi haqida xabarlar tarqalgan. Rejaga ko‘ra, u 27 iyun kuni Gresiyaning Afina shahrida ko‘rgazmali jang o‘tkazishi kerak edi.