Афсонавий боксчи Флойд Мейвезер Лас Вегасда қимматбаҳо соат харид қилишда фирибгарликка қўл урганликда айбланмоқда. Шу сабабли унинг устидан жиноят иши қўзғатилган. Al Jazeera нашрининг хабар беришича, 49 ёшли собиқ боксчи 2024-йилнинг декабрь ойида “Gold and Beyond” дўконига 200 минг долларлик чек ёзиб берган. Бироқ унинг банк ҳисобида бундай маблағ бўлмаган. Лас Вегас прокуратураси буни қасддан қилинган фирибгарлик деб баҳоламоқда.

Унга кўра, 15 июнь, душанба куни ушбу иш бўйича ўтган дастлабки суд мажлисида Мейвезернинг ўзи қатнашмаган, унинг ўрнига адвокати иштирок этган. Боксчига нисбатан расман “йирик миқдордаги ўғрилик” ҳамда “фирибгарлик мақсадида сохта чек тақдим этиш” айбловлари эълон қилинган. Навбатдаги суд тингловлари сентябрь ойига белгиланган.

Невада штати қонунларига кўра, агар Флойднинг айби тасдиқланса, фирибгарлик учун 1 йилдан 4 йилгача, йирик ўғрилик учун эса 1 йилдан 20 йилгача қамоқ жазосига ҳукм қилиниши мумкин. Шунингдек, у катта миқдорда жарима тўлаши ва етказилган зарарни қоплаши керак бўлади. Боксчининг вакиллари ҳозирча бу ҳолат юзасидан ҳеч қандай изоҳ бермаган.

Таъкидлаш керакки, сўнгги пайтларда Мейвезернинг бу каби муаммолари кўпайиб қолган. Аввалроқ у Нью Йоркда ижара пулини тўламагани учун судга берилган, шунингдек, бир неча заргарлар билан ҳам молиявий можароларга ўралашиб қолганди. Унинг ўзи эса собиқ менежерини кўп йиллик фирибгарликда айблаб, судга даъво аризаси киритган.

Эслатиб ўтамиз, Мейвезер профессионал боксда 50 та жанг ўтказиб, уларнинг ҳеч қайсида мағлуб бўлмаган. Беш карра Жаҳон чемпиони шу ёзда яна рингга қайтиши ҳақида хабарлар тарқалган. Режага кўра, у 27 июнь куни Грециянинг Афина шаҳрида кўргазмали жанг ўтказиши керак эди.