Milanning «Inter» klubi «Liverpul» yarim himoyachisi Kyortis Jons transferi ustida ishlashda davom etmoqda.
Insayder Nikolo Skiraning xabar berishicha, klublar o‘rtasida ingliz futbolchisi bo‘yicha yangi to‘g‘ridan-to‘g‘ri muzokaralar rejalashtirilgan — uchrashuv keyingi haftada bo‘lib o‘tadi. 25 yoshli futbolchi «neradzurri»ning transfer bozoridagi ustuvor maqsadi bo‘lib qolmoqda. Italiya grandi «qizillar» xavbekining o‘zi bilan shaxsiy shartnoma shartlarini kelishib olgan — kelishuv 2031 yilgacha mo‘ljallangan. Endilikda faqat «Liverpul»ning roziligini olish qoldi.
Kyortis Jons faoliyatining boshidan buyon mersisaydliklar sharafini himoya qilib kelmoqda. Yakunlangan mavsumda futbolchi jamoa safida 49 ta o‘yinda maydonga tushib, 3 ta gol va 3 ta golli uzatmani o‘z hisobiga yozdirib qo‘ydi.
