«Seltik» klubining belgiyalik yarim himoyachisi Arne Engels yozgi transfer oynasida klubini o‘zgartirishi mumkin.
Football Insider nashri bergan ma’lumotlarga ko‘ra, «Seltik» rahbariyati Engelsni sotishga tayyor. Vaholanki, klub shu yilning yanvar oyida «Nottingem Forest» tomonidan bo‘lgan 29 million yevrolik taklifni rad etgan edi. Avvalroq Shotlandiya chempionlari yarim himoyachini «daxlsiz futbolchi» deb hisoblashardi, biroq endilikda munosib taklif tushsa, uni qo‘yib yuborishga rozi.
Hozirda Engelsga «Kristal Pelas», Dortmundning «Borussiya»si va yana o‘sha «Nottingem Forest» klublari jiddiy qiziqish bildirmoqda.
Yakunlangan mavsumda yarim himoyachi barcha musobaqalarda jami 46 ta uchrashuvda maydonga tushib, o‘z hisobiga 7 ta gol va 8 ta golli uzatmani yozdirib qo‘ydi.
Transfermarkt mutaxassislari Engelsning transfer bahosini 20 million yevroga baholamoqda.
