Germaniya terma jamoasi bosh murabbiyi Yulian Nagelsmann Angliya terma jamoasi ustozi Tomas Tuxelning fikrini qo‘llab-quvvatladi. Bundan oldinroq Tuxel Jahon chempionati o‘yinlarida davlat madhiyalari yangrayotgan mahal fotograflarning joylashuvini keskin tanqid qilgan edi.

Tuxelning so‘zlariga ko‘ra, fotomuxbirlar jamoalar zaxira o‘rindig‘iga haddan tashqari yaqin kelib olishmoqda. Oqibatda murabbiylar shtabi ulardan boshqa hech kimni, hatto o‘z futbolchilarini ham ko‘ra olishmayapti.

«Bu borada qanchalik shikoyat qilishimiz to‘g‘ri bo‘ladi, bilmadim-u, lekin men Tuxelning fikriga mutlaqo qo‘shilaman. Milliy madhiya ijro etilayotgan daqiqalar — juda hissiyotli lahzalardir. Menda shunday taassurot uyg‘onmoqdaki, ularning ulkan ob’ektivlari bir santimetr masofadan turib, hatto burnimning ichidagi tuklarni ham suratga olayotgandek», — deya Nagelsmannning so‘zlarini keltiradi «Globo Esporte».

Ushbu noqulayliklarga qaramay, inglizlar mundial startida Xorvatiya ustidan ishonchli g‘alabaga (4:2) erishishdi. Germaniya terma jamoasi esa Kyurasaoni tor-mor etganidan so‘ng (7:1), ikkinchi turda Kot-d'Ivuar to‘sig‘idan qiyinchilik bilan (2:1) o‘tib oldi.