Kot-d'Ivuar terma jamoasi vingeri Amad Diallo Jahon chempionati guruh bosqichida Germaniyaga qarshi kechgan bahsdan so‘ng o‘z fikrlari bilan o‘rtoqlashdi. Afrikaliklar uchrashuvning hakam tomonidan qo‘shib berilgan daqiqalarida hal qiluvchi golni o‘tkazib yuborib, 1:2 hisobida mag‘lubiyatga uchrashgan edi.
«Jamoamiz mamlakatimiz uchun tarixga kirishni xohlaydi. Uchinchi o‘yinda maydonga maksimal jangovar kayfiyat bilan tushamiz. Bu biz uchun juda muhim palla bo‘ladi. Jamoani qiyin o‘yin kutmoqda. Biz bor e’tiborimizni shu bahsga qaratganmiz», — deya futbolchining so‘zlarini keltiradi APNews nashri.
So‘nggi tur oldidan Kot-d'Ivuar terma jamoasi 3 ochko bilan guruhda ikkinchi o‘rinni egallab turibdi. Afrikaliklar uchinchi uchrashuvni Kyurasao terma jamoasiga qarshi o‘tkazishadi.
