Кот-д'Ивуар терма жамоаси вингери Амад Диалло Жаҳон чемпионати гуруҳ босқичида Германияга қарши кечган баҳсдан сўнг ўз фикрлари билан ўртоқлашди. Африкаликлар учрашувнинг ҳакам томонидан қўшиб берилган дақиқаларида ҳал қилувчи голни ўтказиб юбориб, 1:2 ҳисобида мағлубиятга учрашган эди.
«Жамоамиз мамлакатимиз учун тарихга киришни хоҳлайди. Учинчи ўйинда майдонга максимал жанговар кайфият билан тушамиз. Бу биз учун жуда муҳим палла бўлади. Жамоани қийин ўйин кутмоқда. Биз бор эътиборимизни шу баҳсга қаратганмиз», — дея футболчининг сўзларини келтиради APNews нашри.
Сўнгги тур олдидан Кот-д'Ивуар терма жамоаси 3 очко билан гуруҳда иккинчи ўринни эгаллаб турибди. Африкаликлар учинчи учрашувни Кюрасао терма жамоасига қарши ўтказишади.
