Eron terma jamoasi bosh murabbiyi Amir Galenoi jahon chempionati guruh bosqichi ikkinchi turida Belgiya bilan qayd etilgan durang (0:0) haqida fikr bildirdi.

«Menimcha, bu juda qiziqarli uchrashuv bo‘ldi. Har ikki jamoa g‘alabaga loyiq edi, ikkalasi ham 3 ochkoni qo‘lga kiritishi mumkin edi. Har bir futbolchiga, ayniqsa Alireza Beyranvandga chin dildan minnatdorchilik bildirmoqchiman», — dedi murabbiy o‘yindan keyingi matbuot anjumanida.

Eron terma jamoasi darvozaboni belgiyaliklarning ko‘plab hujumlariga qaramay, o‘z darvozasi daxlsizligini saqlab qolgani uchun uchrashuvning eng yaxshi futbolchisi deb topildi.

Galenoi, shuningdek, sportga aloqasi bo‘lmagan muammolarga qaramay, uning shogirdlari ko‘plab ekspertlarning kutilmalaridan ziyoda natija ko‘rsata olganini ta’kidladi.

Guruh bosqichining ikki turidan so‘ng Eron terma jamoasi jahon chempionatining pley-off bosqichiga chiqish imkoniyatini saqlab qolmoqda.