Yevropa futbol assosiasiyalari ittifoqi (UEFA) Yevro-2028 musobaqasida FIFA qo‘llayotgan majburiy suv ichish tanaffuslarini joriy etmaslikka qaror qildi.

"The Telegraph" nashrining xabar berishicha, UEFA 2026 yilgi jahon chempionatida qo‘llanilayotgan uch daqiqalik majburiy gidratasiya tanaffuslari amaliyotidan voz kechadi. Mundialda ushbu tanaffuslar sobiq futbolchi Gari Nevill hamda ko‘plab muxlislar tomonidan tanqid qilingan. Xususan, Angliya — Xorvatiya (4:2) uchrashuvi vaqtida o‘yinning to‘xtatilishi tribunalarda noroziliklarga sabab bo‘lgan.

FIFA bunday tanaffuslarni barcha jamoalar uchun teng sharoit yaratish maqsadida majburiy deb hisoblamoqda. Biroq tanqidchilarning fikricha, mazkur to‘xtalishlar amerikalik teletranslyatorlarga qo‘shimcha reklama joylashtirish imkonini bermoqda va o‘yin ritmini buzib, futbolni to‘rt qismga bo‘lib qo‘ymoqda.

Shuningdek, suv ichish tanaffuslari hatto kondisionerli stadionlarda va havo harorati nisbatan mo‘’tadil bo‘lgan uchrashuvlarda ham qo‘llanilgani e’tirozlarga sabab bo‘lgan.

UEFA vakili tashkilot o‘z reglamentini o‘zgartirishni rejalashtirmayotganini ma’lum qildi. Bu qaror Chempionlar ligasi va Angliya, Shotlandiya, Uels hamda Irlandiya mezbonlik qiladigan Yevro-2028 musobaqasiga ham taalluqli.

UEFA qoidalariga ko‘ra, suv ichish uchun tanaffus zarurati har bir o‘yinda alohida baholanadi va faqat kuchli issiq sharoitida qo‘llaniladi. Agar havo harorati 35°C dan yuqori bo‘lsa, tanaffus majburiy hisoblanadi. Harorat ushbu chegaradan past bo‘lgan hollarda esa qarorni uchrashuv bosh hakami qabul qiladi.