Fransiyalik hujumchi Antuan Grizmann AQSHga ko‘chib o‘tmoqda, uni «Orlando» tarkibida kutishyapti. U allaqachon Shimoliy Amerika yo‘nalishi bo‘yicha uchib ketdi va buni tasdiqlovchi tegishli postni ijtimoiy tarmoqlardagi sahifasiga joylashtirdi.
Biroq Ispaniyani tark etishdan (katta ehtimol bilan vaqtinchalikka) oldin, Grizmann yaxshigina investisiya kiritishga ulgurdi — Ispaniya poytaxtining Salamanka mavzesida o‘zining «Grizi Cards» butigini ochdi. Bu do‘konda futbolga qiziqadigan bolakaylar o‘zlarining sevimli futbolchilari tasvirlangan fotokartalarni sotib olishlari mumkin bo‘ladi.
Do‘konning onlayn talqini 2022 yildayoq ishga tushirilgan edi, ammo Grizmann baribir haqiqiy butik ochishni juda ham xohlagandi — va nihoyat o‘z maqsadiga erishdi.
