Madridning “Real” klubi futbolchisi Vinisius Junior yozgi transferlar oynasi vaqtida jamoasini almashtirishi mumkin. Bu haqda jurnalist Ramon Alvares o‘zining X (sobiq Twitter) tarmog‘idagi sahifasida xabar bergan.

Manbaga ko‘ra, Madrid klubi braziliyalik futbolchi bilan shartnomani uzaytirish ehtimoli juda kam, deb hisoblamoqda. Qayd etilishicha, “Real” prezidenti Florentino Peres xohlasa, Vinisiusning moliyaviy talablarini qondira oladi, biroq hozircha rahbariyat bunday qaror qabul qilishga tayyor emas. Shu bilan birga, “Real” rahbariyati yozgi transferlar vaqtida hamma uchun manfaatli taklif bera oladigan xaridor kutayotganini ham yashirmayapti.

Ammo, Vinisiusning kelajagi borasida klub hali yakuniy qarorga kelmagan. Sababi futbolchi ayni paytda Braziliya milliy terma jamoasi safida 2026 yilgi Jahon chempionati bahslarida ishtirok etmoqda. Musobaqa yakuniga yetgach, barchasi hal bo‘lishi kutilmoqda.

Eslatib o‘tamiz, Vinisius Junior 2018 yilda Braziliyaning “Flamengo” klubidan Madridning “Real” jamoasiga o‘tgan edi. Hozirda u “qirollik klubi”ning yetakchi futbolchilaridan biri hisoblanadi. Vinisius hozirga qadar madridliklar safida 373 ta o‘yinda ishtirok etib, o‘z hisobiga 127 ta gol va 100 ta golli uzatma yozdirib qo‘ygan. Uning klub bilan shartnomasi 2027 yilning yoziga qadar amal qiladi.