O‘zbekiston terma jamoasi hujumchisi Eldor Shomurodov faoliyatini Turkiyaning yetakchi klublaridan birida davom ettirishi mumkin.

Manbaning bergan ma’lumotlariga ko‘ra, 30 yoshli forvardga "Fenerbaxche" klubi jiddiy qiziqish bildirmoqda va uni o‘z safiga qo‘shib olish uchun dastlabki qadamlarni tashlashni boshlagan. Shu bilan birga, o‘zbekistonlik futbolchining ayni paytdagi klubi — "Istanbul Bashakshexir" uning transferi uchun so‘ralayotgan mablag‘ni 15 million yevrogacha oshirish niyatida.

Eslatib o‘tamiz, o‘tgan yozda "Istanbul Bashakshexir" Shomurodovning transfer huquqini Italiyaning "Roma" klubidan 5,8 million yevro evaziga sotib olgan edi.

2025/2026 yilgi mavsumda Eldor Shomurodov Turkiya Superligasining eng yaxshi to‘purariga aylandi. U chempionatning 34 ta uchrashuvida 22 ta gol urdi va 5 ta golli uzatmani amalga oshirib, to‘purarlar poygasidagi birinchi o‘rinni forvard Pol Onuachu bilan bo‘lishib oldi.