Markaziy yarim himoyachi Genrix Mxitaryan Milanning «Inter» klubi bilan mehnat bitimini uzaytirdi. Bu haqda Italiya klubi matbuot xizmati rasmiy sayt orqali muxlislarga ma’lum qildi.

Armaniston terma jamoasi faxriysi «neradzurri» safida yana bir yil — 2026/27 yilgi mavsum yakuniga qadar to‘p suradi.

«Inter»ga o‘tgan vaqtidan beri Mxitaryan jamoaga ulkan tajriba, yuqori texnik mahorat va favqulodda taktik zehn olib kirdi hamda o‘zini “neradzurri” yarim himoyasining asosiy figurasi sifatida namoyish eta oldi», — deyiladi klub bayonotida.

37 yoshli yarim himoyachi Milan jamoasida 2022 yildan buyon o‘ynab kelmoqda. U ushbu davr mobaynida barcha turnirlarda 187 ta o‘yinda maydonga tushib, 12 ta gol va 21 ta golli uzatmaga mualliflik qildi. «Inter» tarkibida Mxitaryan ikki bor Italiya chempioni unvoniga sazovor bo‘lgan.