Senegal terma jamoasi bosh murabbiyi Pap Tiav JCH-2026ning 1/16 finali doirasida Belgiyaga qarshi kechadigan o‘yindan kutayotgan umidlari bilan o‘rtoqlashdi. Uchrashuv Sietldagi «Lyumen Fild» stadionida bo‘lib o‘tadi.

«Biz g‘alaba qozonishda davom etishimiz kerak. Ushbu o‘yinda zafar quchib, keyingi bosqichga yo‘l olishga qat’iy ahd qilganmiz. Biz uchun yangi musobaqa boshlanmoqda. Guruhda birinchi o‘rinni egallab ham turnirdan chiqib ketish hech gap emas. Marokash va Niderlandiya o‘rtasidagi bahsda bunga guvoh bo‘ldik. G‘alaba qozonib, oldinga harakat qilish uchun qat’iyatli bo‘lishimiz lozim.

Biz ushbu uchrashuvga katta qat’iyat va ishonch bilan, shu bilan birga, Belgiyaga nisbatan yuksak hurmat bilan yondashmoqdamiz. Bu jamoa hayratlanarli natijalar ko‘rsatmoqda. Ular Yevropa va jahon futbolida jiddiy kuch hisoblanadi. Ammo biz turnirda qolish uchun bor kuchimizni berishga tayyormiz.

Ushbu o‘yinga qo‘limizdan kelgancha eng yaxshi boshlang‘ich tarkibni tushirishga harakat qilamiz. Biroq o‘yin boshidan oxirigacha juda muhim ahamiyatga ega bo‘lishini bilamiz. Zaxiradan maydonga tushadigan har bir futbolchi, shubhasiz, o‘z hissasini qo‘sha oladi.

Guruh bosqichidagi dastlabki ikki o‘yindagi mag‘lubiyat og‘ir bo‘ldi. Iroqqa qarshi bahsda strategiyani o‘zgartirishimiz kerak edi va pley-offga chiqish uchun aynan shunday yo‘l tutdik», — dedi Tiav.