Сенегал терма жамоаси бош мураббийи Пап Тиав ЖЧ-2026нинг 1/16 финали доирасида Бельгияга қарши кечадиган ўйиндан кутаётган умидлари билан ўртоқлашди. Учрашув Сиэтлдаги «Люмен Филд» стадионида бўлиб ўтади.

«Биз ғалаба қозонишда давом этишимиз керак. Ушбу ўйинда зафар қучиб, кейинги босқичга йўл олишга қатъий аҳд қилганмиз. Биз учун янги мусобақа бошланмоқда. Гуруҳда биринчи ўринни эгаллаб ҳам турнирдан чиқиб кетиш ҳеч гап эмас. Марокаш ва Нидерландия ўртасидаги баҳсда бунга гувоҳ бўлдик. Ғалаба қозониб, олдинга ҳаракат қилиш учун қатъиятли бўлишимиз лозим.

Биз ушбу учрашувга катта қатъият ва ишонч билан, шу билан бирга, Бельгияга нисбатан юксак ҳурмат билан ёндашмоқдамиз. Бу жамоа ҳайратланарли натижалар кўрсатмоқда. Улар Европа ва жаҳон футболида жиддий куч ҳисобланади. Аммо биз турнирда қолиш учун бор кучимизни беришга тайёрмиз.

Ушбу ўйинга қўлимиздан келганча энг яхши бошланғич таркибни туширишга ҳаракат қиламиз. Бироқ ўйин бошидан охиригача жуда муҳим аҳамиятга эга бўлишини биламиз. Захирадан майдонга тушадиган ҳар бир футболчи, шубҳасиз, ўз ҳиссасини қўша олади.

Гуруҳ босқичидаги дастлабки икки ўйиндаги мағлубият оғир бўлди. Ироққа қарши баҳсда стратегияни ўзгартиришимиз керак эди ва плей-оффга чиқиш учун айнан шундай йўл тутдик», — деди Тиав.