Angliyalik sobiq futbolchi va murabbiy Skott Parker Angliya terma jamoasining hozirgi tarkibidagi asosiy futbolchini ma’lum qildi. Yaqin vaqtgacha «Byornli»da ishlagan 45 yoshli mutaxassis «Arsenal» yarim himoyachisi Deklan Raysni alohida qayd etdi.
«Angliyaning g‘alabadan umidlari haqida gapirganimda, xayolimga to‘rtta so‘z keladi: «Bizga Deklan Rays kerak». Bunday futbolchi – har qanday murabbiyning orzusi. Agar terma jamoa uzoqroqqa bormoqchi bo‘lsa, u Tuxelga juda zarur. Deklan maydonda undan nima so‘ralsa, barchasini bajarishga tayyor. Men Raysni shaxsan tanimayman, lekin uning ahamiyati qanchalik katta ekanligini tushunish uchun o‘z jamoalarim bilan unga qarshi yetarlicha to‘qnash kelganman», – deya Parkerning so‘zlarini keltirmoqda Angliya OAVlari.
Inglizlar Jahon chempionatining 1/16 finalida DR Kongoni qiyinchilik bilan mag‘lub etishdi (2:1). O‘yinda Harri Keyn dublga erishgan bo‘lsa, Deklan Rays 89-daqiqada zaxiraga olindi.
