«Arsenal» jamoasi sardori Martin Edegor shu yozda Turkiyaning «Galatasaroy» klubiga o‘tishni rejalashtirmayapti, deb xabar bermoqda Goal.com nashri.

Ehtimoliy transfer haqidagi gap-so‘zlar yolg‘on bo‘lib chiqdi. Shu hafta Turkiya OAVlarida «Galatasaroy» «Arsenal» yulduziga qiziqish bildirayotgani haqida mish-mishlar tarqalgan edi. Hatto futbolchi va klub o‘rtasida shaxsiy shartnoma shartlari kelishib olingani ham iddao qilindi. Biroq Goal.com manbalariga ko‘ra, ushbu ma’lumotlar haqiqatga mutlaqo to‘g‘ri kelmaydi.

Edegor «Arsenal»da qolishni istaydi, klub rahbariyati esa o‘z kapitanini jamoada saqlab qolishdan mamnun. 27 yoshli yarim himoyachi 2021 yildan buyon «kanonirlar» sharafini himoya qilib kelmoqda. Bu davr mobaynida xavbek «Arsenal» libosida umumiy hisobda 234 ta uchrashuvda maydonga tushib, 42 ta gol urishga erishgan.