Senegal terma jamoasi jahon chempionatini tark etganidan so‘ng, milliy terma jamoaning o‘yinlarga tayyorgarligi bilan bog‘liq katta mojaro yuzaga keldi. Sport News Africa nashrining xabariga ko‘ra, turnir davomida futbolchilar sport rejimini qo‘pol ravishda buzishga yo‘l qo‘yishgan.

Terma jamoaning ayrim a’zolari mehmonxonaga muntazam ravishda do‘stlarini taklif qilib, spirtli ichimliklar va qimmatbaho sovg‘alar bilan yopiq kechalar tashkil qilishgan. Murabbiylar shtabidagi ayrim xodimlarning loqaydligi sababli futbolchilar o‘z holiga tashlab qo‘yilgan va mehmonxonaga fastfud buyurtma qilishgan.

Terma jamoa bosh murabbiyi Pap Tiav Norvegiyaga qarshi o‘yin oldidan jamoa bilan amaldagi shartnomaga ega bo‘lmagan. Yangi bitim so‘nggi soniyalarda — jamoa stadionga yo‘l olishidan bir oz oldin imzolangan.

Senegallik muxlislar ijtimoiy tarmoqlarda sodir bo‘lgan voqealarni keskin tanqid qilishga ulgurishdi. Senegal futbol federasiyasi tomonidan hozircha rasmiy munosabat bildirilgani yo‘q.