Сенегал терма жамоаси жаҳон чемпионатини тарк этганидан сўнг, миллий терма жамоанинг ўйинларга тайёргарлиги билан боғлиқ катта можаро юзага келди. Sport News Africa нашрининг хабарига кўра, турнир давомида футболчилар спорт режимини қўпол равишда бузишга йўл қўйишган.

Терма жамоанинг айрим аъзолари меҳмонхонага мунтазам равишда дўстларини таклиф қилиб, спиртли ичимликлар ва қимматбаҳо совғалар билан ёпиқ кечалар ташкил қилишган. Мураббийлар штабидаги айрим ходимларнинг лоқайдлиги сабабли футболчилар ўз ҳолига ташлаб қўйилган ва меҳмонхонага фастфуд буюртма қилишган.

Терма жамоа бош мураббийи Пап Тиав Норвегияга қарши ўйин олдидан жамоа билан амалдаги шартномага эга бўлмаган. Янги битим сўнгги сонияларда — жамоа стадионга йўл олишидан бир оз олдин имзоланган.

Сенегаллик мухлислар ижтимоий тармоқларда содир бўлган воқеаларни кескин танқид қилишга улгуришди. Сенегал футбол федерацияси томонидан ҳозирча расмий муносабат билдирилгани йўқ.