Professional futbolchilarning xalqaro kasaba uyushmasi (FIFPro) FIFAdan Jahon chempionatining barcha o‘yinlarida majburiy suv ichish uchun tanaffuslar joriy etishni so‘ramaganini bildirdi.

Avvalroq FIFA rahbari Janni Infantino har bir taym o‘rtasidagi to‘xtalishlar futbolchilarning sog‘lig‘ini himoya qilish maqsadida joriy etilganini va buning tijorat manfaatlariga hech qanday aloqasi yo‘qligini ta’kidlagan edi. Biroq The Times nashrining FIFPro'dagi manbalari tashkilot barcha o‘yinlarda bunday to‘xtalishlarni «mutlaqo» talab qilmaganini ma’lum qildi.

Kasaba uyushmasining pozisiyasi o‘zgarishsiz qolmoqda: suv uchun tanaffuslar faqatgina ob-havo haddan tashqari issiq bo‘lgan — harorat 28 darajadan yuqori bo‘lgan o‘yinlardagina zarur.

«Biz bu tanaffuslarning har bir o‘yinda bo‘lishini istamagandik. Harorati nazorat qilinadigan (kondisionerli) stadionlarda bundan hech qanday mantiq yo‘q — faqat tijoriy maqsadlar bundan mustasno», — deydi FIFPro'ning yuqori lavozimli vakillaridan biri.

FIFA ushbu tanaffuslarga Coca-Cola kompaniyasiga tegishli Powerade brendi homiylik qilayotganini tasdiqladi, biroq bu shunchaki avvaldan mavjud bo‘lgan homiylik shartnomasining bir qismi ekanligini da’vo qilmoqda. Shuningdek, telekanallar ham ushbu qo‘shimcha to‘xtalishlardan reklama namoyish etish uchun foydalanmoqda.