Senegal terma jamoasi va «Kristal Pelas» klubining hujumkor yarim himoyachisi Ismaila Sarr yozgi transfer bozorida katta qiziqishlar markazida bo‘lib turibdi. Bu haqda Teamtalk jurnalistlari xabar bermoqda.

Manbaning bergan ma’lumotlariga ko‘ra, «Manchester Yunayted» futbolchini o‘z safiga qo‘shib olishni juda istamoqda. Biroq Turinning «Yuventus» klubi «qizil iblislar»ga xalaqit berish niyatida. Senegallik futbolchining transfer bahosi 40 million yevroga baholanmoqda. Uning «burgutlar» bilan amaldagi shartnomasi 2030 yilning yoziga qadar mo‘ljallangan.

Yakunlangan Angliya Premyer-ligasi mavsumida 28 yoshli yarim himoyachi 28 ta uchrashuvda maydonga tushib, o‘z hisobiga 9 ta gol va 1 ta golli uzatma yozdirib qo‘yishga muvaffaq bo‘ldi.