«Chelsi» klubining sobiq futbolchisi Gael Kakuta 35 yoshida faoliyatini yakunlaganini e’lon qildi.

«Yosh o‘tayotganiga quloq solish va har bir narsaning o‘z nihoyasi borligini tan olish kerak bo‘lgan payt keladi. Hozir faoliyatimni yakunlaganimni e’lon qilmoqchiman. Mening yo‘limda uchragan barchaga: oilamga, yaqinlarimga, murabbiylarimga, jamoadoshlarimga, rahbarlarga, muxlislarga va menga ishongan barcha insonlarga minnatdorchilik bildiraman», — deb yozdi Kakuta ijtimoiy tarmoqlarda.

Gael Kakuta faoliyati davomida bir qator taniqli klublarda, jumladan, «Chelsi», «Fulxem», «Lasio», «Sevilya», «Rayo Valyekano», «Lans» va boshqa jamoalarda to‘p surgan. U «Chelsi» safida 2009/10 yilgi mavsumda Angliya chempioni va o‘sha mavsumda Angliya Kubogi sohibiga aylangan. Shuningdek, Kakuta Fransiya terma jamoasi bilan 19 yoshgacha bo‘lgan futbolchilar o‘rtasida Yevropa chempioni bo‘lgan va turnirning eng yaxshi futbolchisi deb topilgan.