Myunxenning «Bavariya» klubi yarim himoyachisi Jamal Musiala Jahon chempionatidan qaytib kelganidan so‘ng rejali jarrohlik amaliyotini boshdan kechirdi. Bu haqda klub matbuot xizmati xabar bermoqda.
Bild nashrining qayd etishicha, ushbu operasiya Musialaning oyoq kafti suyagidan metall plastinani olib tashlash uchun o‘tkazilgan. Mazkur plastina futbolchiga o‘tgan yozda bajarilgan jarrohlik amaliyotidan so‘ng o‘rnatilgan edi.
Klub rahbariyati operasiya oddiy xususiyatga ega bo‘lganini va maqbul muddatlarda amalga oshirilganini ta’kidladi. «Bavariya» futbolchining alohida dastur asosidagi tiklanish muddatlariga aniqlik kiritmadi, biroq sog‘ayish jarayoni rejadagidek ketayotganini alohida urg‘uladi.
Katta ehtimol bilan, Musiala yangi mavsumda «Bavariya»ning ilk rasmiy uchrashuvlariga qadar to‘liq safga qaytishi va tayyor bo‘lishi kutilmoqda.
