Meksikalik hujumchi Santyago Ximenes Jahon chempionati-2026 doirasida Angliya terma jamoasiga qarshi kechgan bahsda og‘ir jarohat oldi. «Milan» forvardi maydonni mustaqil tarzda tark eta olmadi — uni zambilda olib chiqib ketishdi.
Fox Sports nashrining xabar berishicha, 25 yoshli hujumchi sakkiz haftagacha bo‘lgan muddatga safdan chiqqan. Unga paylarning ikkinchi darajali cho‘zilishi tashxisi qo‘yildi.
Yakunlangan mavsumda Ximenes «rossonerilar» safida 18 ta o‘yinda maydonga tushib, o‘z hisobiga bitta gol va uchta golli uzatmani yozdirib qo‘ygan edi. Meksikalik futbolchining Milan klubi bilan shartnomasi 2029 yilgacha mo‘ljallangan.
Eslatib o‘tamiz, Italiya Seriya Asining yangi mavsumi 22 avgust kuni start oladi.
