Belgiya terma jamoasi hujumchisi Romelu Lukaku zaxiradan maydonga tushganidan so‘ng yana gol urishga muvaffaq bo‘ldi. «Napoli» futbolchisi JCH-2026ning 1/8 finalidan o‘rin olgan AQSHga qarshi bahsning 67-daqiqasida maydonda paydo bo‘ldi va 93-daqiqada tablodagi yakuniy hisobni o‘rnatdi — 4:1. Opta tahlillariga ko‘ra, Lukaku Jahon chempionatlari tarixida to‘rtta uchrashuvda zaxiradan maydonga tushib gol urgan ilk futbolchiga aylandi.
Joriy mundialda Romelu Lukaku hisobida jami uchta gol va bitta golli uzatma mavjud.
Belgiyaliklarning navbatdagi raqibi Ispaniya terma jamoasi bo‘ladi. 1/4 final doirasidagi ushbu uchrashuv 10 iyul kuni Toshkent vaqti bilan 11 iyulga o‘tar kechasi soat 00:00 da bo‘lib o‘tadi.
