JCH-2026 1/8 finalidan o‘rin olgan Argentina va Misr terma jamoalari o‘rtasidagi uchrashuvning bosh hakami Fransua Leteksye o‘yinni yuqori saviyada boshqarib bordi va unga hamda VAR ishiga hech qanday e’tiroz yo‘q.
Bu haqda jurnalistlarga FIFA hakamlar qo‘mitasi raisi Pyerluiji Kollina ma’lum qildi. U eng ko‘p savollarni keltirib chiqargan ikkita vaziyatni tahlil qildi: Misrning bekor qilingan golidan oldin Marvan Attia tomonidan sodir etilgan qoidabuzarlik va argentinaliklar jarima maydonchasida Xulian Alvares hamda Muhammad Salah o‘rtasidagi kurash.
Kollinaning so‘zlariga ko‘ra, Attia Lisandro Martinesning oyog‘ini aniq bosib olgan. U VAR qoidabuzarlik bilan gol urilgan vaqt oralig‘ini yoki masofani hisobga olmasligini, balki hujum fazasini to‘liq o‘rganishini ta’kidladi.
«Muhammad Saloh va Xulian Alvares ishtirokidagi vaziyatni hakam va VAR tizimidagi sudyalar oddiy futbol kontaktlari deb hisoblashdi», — deya Kollinaning so‘zlaridan iqtibos keltiradi FIFA matbuot xizmati.
Italiyalik mutaxassis har qanday talqinga baribir insoniy omil ta’sir qilishini tan oldi, ammo Jahon chempionatidagi hakamlarning ishiga e’tirozi yo‘qligini qo‘shimcha qildi.
