«Bavariya»ning sobiq hujumchisi Tomas Myuller Germaniya futbol ittifoqining Yurgen Klopp nomzodini tanlagani borasidagi fikrlari bilan o‘rtoqlashdi. Ushbu mutaxassis Germaniya milliy terma jamoasini boshqarishi kutilmoqda.
«Klopp foydasiga qilingan tanlov juda qiziq, chunki u shunchaki murabbiy yoki faqatgina muvaffaqiyatli murabbiy bo‘lgan inson emas. O‘zining hozirgi rolida [Red Bull tizimida] u tuzilmalar va tashkiliy jarayonlarni yaratish bilan ham shug‘ullanmoqda. Gap shunchaki taktik doskaga ismlarni yozadigan yangi murabbiyni olib kelishda emas; zarur o‘zgarishlar amalda hayotga tadbiq etilishi uchun to‘g‘ri tuzilmalarni joriy qilish muhim ahamiyatga ega.
Angliyada murabbiylik qilganingizda, siz shunchaki murabbiydan ancha yuqoriroq figuraga aylanasiz. Siz bevosita ishning o‘zidan ancha yiroqqa chiqadigan butunlay boshqacha jarayonlar va fikrlash tarziga jalb qilinasiz», — dedi Myuller.
Eslatib o‘tamiz, Yurgen Klopp 2015 yildan 2024 yilgacha «Liverpul» klubini boshqargan. Uning qo‘l ostida «qizillar» 8 ta sovringa ega chiqishgan, ular orasida APL va Chempionlar ligasi g‘olibligi ham bor.
