«Manchester Yunayted» klubi amaldagi «Old Trafford» stadioni o‘rnini egallashi kutilayotgan, qiymati 2 milliard funt sterlingga (2,35 milliard yevro) teng bo‘lgan yangi arenaning suratlari va maketlarini rasman taqdim etdi.

100 000 tomoshabinga mo‘ljallangan yangi stadion hozirgi arenadan 350 metr shimoli-g‘arbda joylashadi va Trafford-Uorfsayd hududini rivojlantirish bo‘yicha keng ko‘lamli loyihaning markaziy ob’ektiga aylanadi. Ushbu rejaning amalga oshirilishi 48 000 ta ish o‘rni va 15 000 ta yangi turar joy binolarini yaratish imkonini berishi, shuningdek, Buyuk Britaniya iqtisodiyotiga yiliga 7,3 milliard funt sterling (8,57 milliard yevro) daromad keltirishi kutilmoqda.

Loyiha Trafford kengashi tomonidan «Old Trafford»ni rivojlantirish korporasiyasi va Katta Manchester transport boshqarmasi ko‘magida e’lon qilingan bosh reja doirasida taqdim etildi. Avvalroq klub «Stretford End» tribunasi ortidagi yuk terminali hududida qurilish ishlarini olib borish bo‘yicha muzokaralardan voz kechib, hozirgi stadion yaqinidagi 25 akr maydonga ega yer uchastkasini sotib olgan edi.

«Uorfsayd bosh rejasining e’lon qilinishi Trafford va Katta Manchesterning jo‘shqin hamda transformasiyaga uchrayotgan markazida «Manchester Yunayted» uchun jahon darajasidagi yangi uyni barpo etish yo‘lidagi yana bir muhim bosqichdir», — deya klub yangi stadionni rivojlantirish bo‘yicha direktori Kolett Roshning so‘zlarini keltirdi klub matbuot xizmati.