Eron futbol klublari siyosiy va xavfsizlik sababli joriy mavsumdagi xalqaro uchrashuvlarini o‘z maydonlarida o‘tkaza olmaydigan bo‘ldi. Bu yil Eron sharafini xalqaro maydonda 4 ta klub himoya qilmoqda: ulardan 3 tasi OCHL Elit, 1 tasi esa OCHL-2 musobaqasida ishtirok etadi.
Hozirda Eron tomoni va potensial mezbon davlatlar o‘rtasida uy uchrashuvlarini boshqa mamlakat maydonlarida tashkil etish bo‘yicha muzokaralar olib borilmoqda.
Xususan, Tehronning mashhur «Istiqlol» klubi o‘z uy o‘yinlarini O‘zbekistonda o‘tkazish masalasini ko‘rib chiqmoqda.
Boshqa klublarning rejalari esa quyidagicha ko‘rinish olgan:
«Traktor» jamoasi — Qatarda;
«Golgohar» klubi — Ummonda;
«Chadormalu» jamoasi esa — Tojikistonda mezbonlik qilish variantlari bo‘yicha muzokaralar olib bormoqda.
Hozircha yakuniy kelishuvlar va uchrashuvlar o‘tkaziladigan aniq stadionlar bo‘yicha rasmiy ma’lumot berilmagan, jarayon davom etmoqda.
