Yaqinda Londonning «Chelsi» klubi boshqaruviga kelgan ispaniyalik mutaxassis Xabi Alonso payshanba, 9-iyul kuni bo‘lib o‘tgan ilk mashg‘ulotdan so‘ng shogirdlarining salohiyatini yuqori baholadi.
«Jamoaning salohiyati meni juda ilhomlantirdi. Bu yerda ishlash, o‘yin uslubini shakllantirish, stadionga hissiyotlarni qaytarish va muxlislar bilan aloqa o‘rnatish mumkin bo‘lgan tarkib mavjud», — deya Alonsoning so‘zlaridan iqtibos keltiradi klub matbuot xizmati.
«Ko‘klar»ning yangi ustozi «Chelsi»da ishlash u uchun katta sharaf va sinov ekanligini qo‘shimcha qildi.
Leverkuzenning «Bayer» va Madridning «Real» klublari sobiq murabbiyi «Chelsi» boshqaruvidagi debyutini 24-avgust kuni Angliya premyer-ligasida o‘tkazadi. Yangi mavsumning birinchi turida londonliklar safarda «Fulxem»ga qarshi maydonga tushishadi.
