FIFA prezidenti Janni Infantino kuni kecha jahon chempionatini 64 ta jamoagacha kengaytirish masalasi joriy turnir yakunlangach muhokama qilinishini ma’lum qilgan edi. Jurnalist Romen Molinaning xabar berishicha, Infantino mundialni 2030 yilda o‘tadigan navbatdagi turnirdan boshlaboq kengaytirishga harakat qiladi.

Molina muhim bir jihatni ta’kidlaydi: Infantino mundialni FIFA prezidentligiga qayta saylanish kampaniyasi doirasida kengaytirmoqchi.

«Buning uchun Infantino afrikalik futbol mutasaddilari orasidagi ittifoqchilarining qo‘llab-quvvatlovini olmoqchi. Evaziga ular Infantino yana bir qo‘shimcha muddatga lavozimida qolishi uchun ustavni o‘zgartirishga erishishadi», — deb yozdi Molina ijtimoiy tarmoqlarda.

Janni Infantino FIFA prezidenti lavozimini 2016 yildan beri egallab kelmoqda.