Ispaniya terma jamoasi bosh murabbiyi Luis de la Fuente Fransiya ustidan qozonilgan g‘alaba va JCH–2026 finaliga chiqqanidan so‘ng o‘z taassurotlari bilan o‘rtoqlashdi.
Mutaxassis yarim finalda maydonga tushmagan futbolchilarning munosabatiga alohida to‘xtaldi. Uning ta’kidlashicha, ular uchrashuv tugaganidan keyin ham mashg‘ulotlarni davom ettirishgan.
«Bugun maydonga tushmagan barcha futbolchilar mashg‘ulotlarda qolishdi. Bu jamoamiz qanday xarakterga ega ekanini yaqqol ko‘rsatadi», — dedi de la Fuente DAZN'ga bergan intervyusida.
Shuningdek, ispaniyalik murabbiy terma jamoa boshqaruviga kelgan dastlabki davrlarini eslab, bugungi natijani tasodif deb hisoblamasligini ta’kidladi.
«Hayot shunday. Men ko‘p jihatdan e’tiqodimga tayanaman va bunday voqealar tasodifan yuz bermasligini yaxshi tushunaman. Balki bu taqdirga bitilgandir. Hozir biz eng katta maqsadga juda yaqinmiz. Mening xizmatim boshqalarnikidan ortiq emas, ammo hech qachon mehnat qilishdan to‘xtamaganman. Yiqilasan, keyin yana turib olg‘a harakat qilasan. O‘zimni kimgadir namuna deb bilmayman, ammo agar mening hayot yo‘lim kimgadir yordam bersa, bundan faqat xursand bo‘laman. Ilgari kim biz bu darajagacha yetib kelishimizni aytgan bo‘lardi? Va men doimo aytganimdek: nega endi yo‘q?» — dedi murabbiy.
Eslatib o‘tamiz, Ispaniya yarim finalda Fransiyani 2:0 hisobida mag‘lub etib, JCH–2026 finaliga yo‘l oldi. Endi ispaniyaliklar hal qiluvchi bahsda Angliya — Argentina juftligi g‘olibi bilan kuch sinashadi.
