«Tottenxem» himoyachisi Kristian Romero yozgi transfer oynasida klubni tark etishi mumkin. Bu haqda insayder Fabrisio Romano o‘zining ijtimoiy tarmoqlarida ma’lum qildi.

Manbaga ko‘ra, «Inter» so‘nggi kunlarda London klubi bilan muzokaralar olib borgan va unda argentinalik himoyachining transferi ehtimoliy variantlardan biri sifatida muhokama qilingan. Klublar o‘rtasidagi aloqalar Jed Spens bo‘yicha o‘tkazilgan muzokaralar doirasida yuzaga kelgan.

Milan klubi Romeroning transferiga qiziqish bildirmoqda, biroq potensial kelishuv o‘yinchining yuqori transfer narxi tufayli murakkablashmoqda. Himoyachiga nisbatan «Barselona» ham qiziqish saqlab qolmoqda.

O‘tgan mavsumda 28 yoshli futbolchi 32 ta o‘yinda maydonga tushib, 6 ta gol urdi va 4 ta golli uzatmani amalga oshirdi. Transfermarkt versiyasiga ko‘ra, Romeroning bozor qiymati 45 million yevroni tashkil etadi.