«Arsenal» va Fransiya terma jamoasi markaziy himoyachisi Vilyam Saliba 2026 yilgi jahon chempionati yarim finalida Ispaniyaga qarshi o‘yinda (0:2) og‘ir jarohat oldi va 2027 yilgacha maydonga qayta olmasligi mumkin.
L'Equipe nashri ma’lumotiga ko‘ra, fransiyalik futbolchi bel qismidagi jarohati tufayli kamida to‘rt oydan olti oygacha safdan chiqdi. Manbaning ta’kidlashicha, Salibaga jarrohlik amaliyoti o‘tkazilishi va uzoq muddatli tiklanish jarayoni kerak bo‘ladi.
Shuningdek, jahon chempionati boshlanishidan avval ham Vilyam kuchli og‘riqlardan shikoyat qilgan, ammo shunga qaramay o‘ynashda davom etgani qayd etilmoqda.
2025/2026 yilgi mavsumda Saliba «Arsenal» safida mumkin bo‘lgan 63 uchrashuvdan 50 tasida maydonga tushdi. U jamoaning Angliya Premyer-ligasida chempion bo‘lishi va Chempionlar ligasi finaliga chiqishida hal qiluvchi o‘yinchilardan biri bo‘ldi.
2026 yilgi jahon chempionatida esa Saliba Fransiya terma jamoasi safida oltita o‘yinda ishtirok etdi, ammo gol yoki golli uzatma bilan ajralib tura olmadi.
