Belgiyalik vinger Leandro Trossar «Arsenal» muxlislariga atab xayrlashuv maktubini e’lon qildi. 31 yoshli futbolchi Turkiyaning «Beshiktosh» klubi bilan uch yillik shartnoma imzolab, jamoani tark etdi.

«Men klub va sizlar uchun doimo bor kuchimni berganman. Biz birgalikda ko‘plab ajoyib lahzalarni boshdan kechirdik. Ayniqsa, o‘tgan mavsumda birgalikda chempionlik unvonini qo‘lga kiritganimiz. Bu xotira men bilan abadiy qoladi», — dedi Trossar o‘zining ijtimoiy tarmoqlardagi sahifasida.

«Ishonamanki, biz hali ko‘rishamiz. Klubga kelgusi faoliyatida ulkan muvaffaqiyatlar tilayman, sizlarga esa aytmoqchiman: qayerda bo‘lsam ham, doimo «Arsenal»ni qo‘llab-quvvatlayman. Bir marta «kanonir» — umrbod «kanonir». O‘zingizni ehtiyot qiling».

Trossar londonliklar safida 171 ta o‘yin o‘tkazgan. Futbolchi 36 ta gol va 34 ta golli uzatmani amalga oshirgan. Uning transferi «Beshiktosh»ga 18 million yevroga tushdi.